وقف ترمیمی بل پر مشترکہ پارلیمانی کمیٹی میٹنگ 22/ اگست کو، ملی تنظیمیں جلد مستحکم منصوبہ بنائیں
از… ( مولانا ڈاکٹر ) ابوالکلام قاسمی شمسی
وقف ترمیمی بل 2024 کو مرکزی حکومت کی جانب سے منظوری کے لئے پارلیمنٹ میں پیش کیا گیا، مذکورہ بل میں بہت سے خامیاں تھیں، جس کی وجہ سے وقف جائیداد کو نقصان پہنچنے کا اندیشہ تھا، جس کو ملک کے علماء، دانشوران، ملی و سیاسی قائدین اور اپوزیشن پارٹیوں کے لیڈران کے علاؤہ ملک کے سیکولر برادران وطن نے بھی محسوس کیا، اور اسے مرکزی حکومت کی جانب سے عجلت میں لیا گیا فیصلہ اور ملک کے آئین کے خلاف قرار دیا، چنانچہ جب اس بل کو پارلیمنٹ میں پیش کیا گیا، تو پارلیمنٹ میں تمام اپوزیشن پارٹیوں کے لیڈران نے اس کے خلاف آواز بلند کی، اور اس کو ملک کے آئین کے خلاف اور جمہوری نظام کے مخالف قرار دیا، اور بل کو پاس نہیں ہونے دیا، بالآخر مجبوری کی حالت میں اس بل کو مشترکہ پارلیمانی کمیٹی میں بھیجا گیا، تاکہ مشترکہ پارلیمانی کمیٹی اس پر غور و خوض کر کے اپنی سفارشات پارلیمنٹ میں پیش کرے، اس مشترکہ پارلیمانی کمیٹی میں لوک سبھا اور راجیہ سبھا دونوں کے ممبران شامل کئے گئے ہیں، یہ مشترکہ پارلیمانی کمیٹی وقف ترمیمی بل 2024 کے تمام نکات کا جائزہ لے کر رپورٹ پیش کرے گی، پھر پارلیمنٹ میں بل کے منظور یا نامنظور کا فیصلہ کیا جائے گا.
وقف ترمیمی بل پر غور و خوض کے لئے مشترکہ پارلیمانی کمیٹی کی تشکیل کو نہایت ہی مثبت قدم قرار دیا گیا، جس کی وجہ سے مجوزہ ترمیمی بل پر از سر نو غور و خوض کے لئے مہلت مل گئی، یہ بڑی اہم بات ہے، اس کے لئے تمام بہی خواہان بالخصوص اپوزیشن پارٹیوں کے ممبران کا اقدام قابل ستائش رہا
خبر کے مطابق وقف ترمیمی بل 2024 پر غور و خوض کے لئے مشترکہ پارلیمانی کمیٹی کے ممبران کی میٹینگ مورخہ 22/ اگست 2024 کو ہونے جارہی ہے، میرے مطالعہ کے مطابق اس موقع پر مندرجہ ذیل باتوں کو خاص اہمیت حاصل ہے
(1) وقف ترمیمی بل 2024 ملک کے آئین کے خلاف ہے، اس لئے اس کو مسترد کیا جائے۔
(2) ہوسکتا ہے کہ مسترد کی بات پر اتفاق نہ ہو اور ترمیم کی بات آئے، تو تمام ملی تنظیموں کی جانب سے ایک ہی مضمون کا میمورنڈم مشترکہ پارلیمانی کمیٹی اور ان کے ممبران کی خدمت میں پیش کیا جائے، اس کے لئے تمام ملی تنظیموں کی جانب سے مشترکہ میمورنڈم تیار کیا جائے، بڑی ملی تنظیموں کے قائدین کو جلد اس جانب توجہ کی ضرورت ہے۔
(3) 22/ اگست سے پہلے مشترکہ پارلیمانی کمیٹی میں وقف ترمیمی بل 2024 پر دفعات وائز اصلاح پر مشتمل میمورنڈم جمع کیا جائے۔
(4) میمورنڈم کی کاپی کمیٹی کے ممبران کو انفرادی طور پر بھی دی جائے۔
(5) مشترکہ پارلیمانی کمیٹی کے ممبران سے ملاقات کر کے انہیں اس کی اہمیت اور موقف سے باخبر کیا جائے، تاکہ وہ مجوزہ ترمیم بل کی خامیوں سے واقف ہوں، اور ان خامیوں کو دور کرانے کے لئے آواز بلند کریں۔
اللہ کا شکر ہے کہ وقف ترمیمی بل 2024 کے سلسلہ میں ملی تنظیموں کی جانب سے مسلسل کاروائی کی جاری ہے، مشترکہ پارلیمانی کمیٹی کی پہلی میٹنگ 22/ اگست کو ہے، وقت بہت کم باقی ہے، اس لئے اس جانب خصوصی توجہ کی ضرورت ہے۔ جزاکم اللہ خیرا
