3/ جنوری، پریس ریلیز: قومی کونسل برائے فروغ اردو زبان اور انجمن اسلام کے اشتراک سے ہونے والے 26 ویں اردو کتاب میلہ جو بروز سنیچر 6 تا 14 جنوری کو ممبئی کے BKC گراو نڈ پر منعقد ہو نے جا رہا ہے ،اس تاریخی اردو کتاب میلہ کی تیاری زور و شور سے چل رہی ہے۔ ایک طرف مرکزی سرکار کا عملہ گراؤنڈ پر شاندار پنڈال کی تیاری میں جٹ گیا ہے تو دوسری طرف میلہ کمیٹی کے اراکین شہر کے اردو داں طبقے خصوصاً اُردو اسکولوں کے اساتذہ ، پرنسپل ، مینجمنٹ سے رابطہ قائم کر رہے ہیں اور میلے کی کامیابی کے لئے ان سے تعاون طلب کر رہے ہیں۔
اسی سلسلے کی ایک اہم میٹنگ آج بیٹ افسر الماس افروز شیخ (سیکنڈری اسکول)کی سربراہی میں آر-سی ڈی-ایڈ کالج، امام باڑہ میں منعقد کی گئی ،جس میں کم و بیش چالیس میونسپل اردو اسکولوں کے پرنسپل شریک ہوئے اور انہوں نے اردو میلے میں تمام طلباء کی کم از کم ایک بار شرکت کا یقین دلایا ۔میلہ کمیٹی کی نمائندے فاروق سیّد ، فرید احمد خان اور سلیم الوار ے نے میلے کے اغراض و مقاصد اور تفصیلی پروگرام حاضرین کے گوش گزار کیا۔ اس موقعے پر آںٔیٹا ممبئی ڈویژن کے صدر الیاس خان بھی موجود تھے۔
واضح رہے کہ اس تاریخی اردو کتاب میلہ کی تیاری کے تعلق سے آج ممبئی مراٹھی پتر کار سنگھ میں میلے کے ذمہ داران و معاون حضرات نے ایک پریس کانفرنس کی اور انہوں نے ٢٦/ ویں اردو کتاب میلہ کی تفصیلات اور تیاریوں سے آگاہ کیا۔ جناب اجمل سعید آفیسر انچارج این سی پی یو ایل، ڈاکٹر ظہیر قاضی صاحب صدر انجمن اسلام نے مرکزی طور پر پریس کانفرنس سے خطاب کیا،ساتھ ہی جناب فاروق سید گل بوٹے اور فرید احمد خان اردو کاروان بھی میلے کی تفصیلات اور اہم نکات بیان کیے۔ پریس کانفرنس میں پرنٹ میڈیا اور الیکٹرانک میڈیا کے اہم نمائندگان موجود تھے، آخر میں ان میں سے بعض نے اہم سوالات بھی کیے جن کے تسلی بخش جوابات دیے گئے اور ساتھ ہی لوگوں سے اس کتاب میلہ میں بڑی تعداد میں شرکت کی درخواست کی۔
