بحرِ احمر میں امریکی لڑاکا طیارہ سمندر میں گر کر تباہ، حوثی حملے سے بچنے کے دوران حادثہ

بحرِ احمر میں امریکی لڑاکا طیارہ سمندر میں گر کر تباہ، حوثی حملے سے بچنے کے دوران حادثہ

ای سی نیوز ڈیسک
29 اپریل 2025
بحرِ احمر ____امریکی بحریہ کا ایک F/A-18 سپر ہارنیٹ لڑاکا طیارہ بحرِ احمر میں اُس وقت سمندر برد ہو گیا جب وہ طیارہ بردار بحری جہاز یو ایس ایس ہیری ایس ٹرومین پر واپس لایا جا رہا تھا۔ حادثہ اُس وقت پیش آیا جب جہاز نے یمن کے حوثیوں کے مبینہ حملے سے بچنے کے لیے اچانک موڑ کاٹا۔

امریکی بحریہ کے مطابق طیارہ ہینگر میں کھینچا جا رہا تھا کہ عملے سے اس پر قابو چھوٹ گیا۔ نتیجتاً طیارہ اور اسے کھینچنے والی گاڑی دونوں سمندر میں جا گرے۔ خوش قسمتی سے تمام اہلکار محفوظ رہے، صرف ایک اہلکار کو معمولی چوٹ آئی۔

ایک امریکی اہلکار نے بتایا کہ طیارہ بردار بحری جہاز نے میزائل یا ڈرون حملے سے بچنے کے لیے تیزی سے زگ زیگ انداز میں موڑ لیا۔ حوثی گروپ نے حملے کی ذمہ داری قبول کی ہے۔ اس واقعے کی تحقیقات جاری ہیں۔

بحریہ نے تصدیق کی ہے کہ گرنے والا طیارہ سمندر میں ڈوب چکا ہے۔ ایک F/A-18 کی قیمت 60 ملین ڈالر سے زائد بتائی گئی ہے۔ اس حادثے کے باوجود ٹرومین کیریئر اسٹرائیک گروپ مکمل طور پر آپریشنل ہے۔

واضح رہے کہ اس سال فروری میں یہی بحری جہاز مصر کے قریب ایک تجارتی جہاز سے ٹکرا گیا تھا۔ دسمبر میں بھی اسی طیارہ بردار جہاز سے اُڑنے والے ایک اور F/A-18 کو غلطی سے امریکی ہی جنگی بحری جہاز نے نشانہ بنا دیا تھا، تاہم دونوں پائلٹ بحفاظت نکل آئے تھے۔

بحرِ احمر میں کشیدگی اُس وقت بڑھ گئی تھی جب امریکہ نے اسرائیل کے خلاف حوثیوں کے حملوں کو روکنے کے لیے وہاں بحری آپریشن کا آغاز کیا۔ حوثی گروپ اس جنگ کو غزہ پر اسرائیلی جارحیت کے خلاف فلسطینیوں کی حمایت قرار دیتے ہیں۔

حوثیوں نے حال ہی میں دعویٰ کیا کہ امریکی فضائی حملے نے یمن میں ایک قیدی مرکز کو نشانہ بنایا جس میں درجنوں افریقی تارکین وطن ہلاک ہو گئے۔ امریکی فوج نے اس پر کوئی فوری تبصرہ نہیں کیا۔