ملت ٹائمز کے بانی چیف ایڈیٹر جناب شمس تبریز قاسمی کو ملت پرائیڈ ایوارڈ
ای سی نیوز ڈیسک
ارریہ : ملک کے معروف نوجوان صحافی، جناب شمس تبریز قاسمی—بانی و چیف ایڈیٹر، ملت ٹائمز—کو ان کی صحافتی خدمات کے اعتراف میں "ملت پرائیڈ ایوارڈ” سے نوازا گیا۔ یہ ایوارڈ ان کی بے خوف، بے لاگ اور حق گو صحافت کے ساتھ ساتھ بے آوازوں کی آواز بننے کے جذبے کے اعتراف میں دیا گیا۔
یہ ایوارڈ المَنْصُور فاؤنڈیشن، انڈیا کی جانب سے الغزالی انٹرنیشنل اسکول، ارریہ کے زبیر الحسن میموریل لائبریری میں منعقد ایک پُروقار تقریب کے دوران پیش کیا گیا۔
تقریب کی صدارت المَنْصُور فاؤنڈیشن، انڈیا کے چیئرمین مولانا مدثر احمد قاسمی نے کی۔ اس موقع پر مولانا قاسمی نے کہا کہ: "جناب شمس تبریز قاسمی صاحب کی زندگی ہم سب کے لیے ایک کھلی کتاب ہے، جس کے ہر ورق پر عزم، حوصلہ اور سچائی کی داستان رقم ہے۔ انہوں نے اپنی صحافتی زندگی کا آغاز نہایت سادہ اور بے سروسامانی کے عالم میں کیا، مگر اپنے اخلاص، استقامت اورجہدِ پیہم سے بہت ہی کم عرصے میں ملکی صحافت کے افق پر ایک روشن اور منفرد مقام حاصل کر لیا۔ آج ان کا نام جرات مندانہ صحافت، اصول پسندی اور سچائی کے استعارے کے طور پر لیا جاتا ہے۔ ان کی یہ کامیابی اس بات کی روشن مثال ہے کہ اگر ارادے پختہ ہوں اور نیت خالص، تو وسائل کی کمی کبھی رکاوٹ نہیں بنتی۔”
فاؤنڈیشن کے جنرل سکریٹری مولانا شاہجہان ندوی نے کہا کہ: "ہم شمس تبریز قاسمی صاحب کے لیے دعاگو ہیں کہ اللہ تعالیٰ اُن کی صحافتی زندگی کو مزید تابناک بنائے، اور وہ سچائی اور انصاف کی راہ میں اسی جذبے کے ساتھ آگے بڑھتے رہیں۔”
تقریب میں مقامی دانشوروں، اساتذہ، طلبہ اور سماجی شخصیات نے بڑی تعداد میں شرکت کی۔ شرکاء نے شمس تبریز قاسمی کی خدمات کو سراہتے ہوئے کہا کہ اُن کی صحافت نے نوجوان نسل کو شعور اور سچ بولنے کا حوصلہ دیا ہے۔
