ملی اداروں کا مستقبل اور نوکِ قلم پر لٹکتی تلوار: ایف سی آر اے (FCRA) ترمیمی بل 2026 کا ایک تجزیہ

✍️ مفتی توقیر بدر آزاد

تاریخ کے سفر میں کچھ لمحات ایسے آتے ہیں جو محض وقت کی تبدیلی کا اشارہ نہیں ہوتے، بلکہ آنے والی کئی دہائیوں کی تقدیر کا فیصلہ کر دیتے ہیں۔ 12 اگست 2026 کو پارلیمنٹ کے ایوان میں بحث و منظوری کے لیے پیش ہونے والا ‘ایف سی آر اے ترمیمی بل’ محض ایک قانونی دستاویز نہیں، بلکہ ریاستی اختیارات کی وسعت اور شہری آزادیوں کے سکڑتے ہوئے سائے کے درمیان کھینچی گئی ایک ایسی لکیر ہے جو مستقبل کا نقشہ مرتب کرے گی۔ یہ سوال صرف چندے کا نہیں، یہ سوال بقا، ملکیت اور دستورِ ہند کی روح کا ہے۔

ایک لمحۂ فکریہ:خونِ جگر سے سینچے گئے گلشن کی کہانی
تصور کیجیے! آپ نے برسوں کی ریاضت، شبانہ روز کی محنت اور قوم کے مخلص افراد کے تعاون سے ایک ادارہ کھڑا کیا۔ کسی نے اپنی زمین وقف کی، کسی نے اپنی جمع پونجی عمارت کی نذر کی، اور کسی نے یتیموں کی کفالت کے لیے اپنا حصہ ڈالا۔ اس ادارے کی بنیادوں میں غیر ملکی عطیات کا بھی ایک حصہ شامل تھا۔ برسوں بعد ایک دن سرکار کا فرمان آتا ہے کہ آپ کا ‘ایف سی آر اے’ سرٹیفکیٹ منسوخ کر دیا گیا ہے۔ شاید آپ مصلحت کے تحت کہہ دیں کہ "ہم آئندہ غیر ملکی مالیات سے کنارہ کشی اختیار کر لیں گے،” لیکن اگر جواب یہ ملے کہ "اب اس ادارے کی زمین اور اثاثے بھی آپ کے نہیں رہے،” تو اس وقت کیا بیتے گی؟
یہیں سے وہ سنگین صورتحال جنم لیتی ہے جہاں قانون کی حکمرانی اور اداراتی ملکیت کے درمیان تصادم کا خدشہ پیدا ہوتا ہے۔ یہی وہ نکتہ ہے جسے سمجھنا ہر اس شخص کے لیے ضروری ہے جو کسی سماجی یا تعلیمی ادارے سے وابستہ ہے۔

قانون کا ارتقا: نگرانی سے گرفت تک
ایف سی آر اے (Foreign Contribution Regulation Act) کوئی نووارد قانون نہیں ہے۔
1976 میں جب اس کی بنیاد پڑی تو مقصد یہ تھا کہ بیرونی سرمایہ ملک کی سیاست اور سماج پر اثر انداز نہ ہو۔ وقت کے ساتھ ساتھ اس میں ترامیم آتی رہیں—2010، 2016، 2018 اور پھر 2020 کی سختیاں۔ ان ترامیم کا سفر شفافیت سے شروع ہوا اور اب ایک ایسی منزل پر آن پہنچا ہے جہاں انتظامی اختیارات کی حدیں لاامتناہی ہوتی دکھائی دے رہی ہیں۔ اب سوال صرف پیسے کے حساب کا نہیں، بلکہ اس پیسے سے بننے والی جائیدادوں پر قبضے کا ہے۔

حکومت کا موقف اپنی جگہ وزنی ہو سکتا ہے کہ غیر ملکی سرمایہ ‘منی لانڈرنگ’ یا ‘قومی سلامتی’ کے لیے خطرہ بن سکتا ہے۔ اس سے کسی کو اختلاف نہیں کہ پیسے کا منبع اور مصرف واضح ہونا چاہیے، لیکن کیا کسی انتظامی لغزش کی سزا پورے ادارے کی ضبطی ہوسکتی ہے؟ سپریم کورٹ کے مطابق غیر ملکی امداد کوئی ‘مطلق بنیادی حق’ نہیں، مگر کیا اس کا مطلب یہ ہے کہ قانونی طور پر حاصل کردہ اثاثے بھی ریاست کی چراگاہ بن جائیں؟

خدشات کی بنیاد:جائیدادوں کی عارضی و مستقل تحویل
اس مجوزہ بل میں سب سے زیادہ تشویشناک پہلو ‘نامزد مجاز اتھارٹی’ (Designated Authority) کا تصور ہے۔ اگر کسی ادارے کا رجسٹریشن ختم ہوتا ہے، تو اس کے اثاثے عارضی طور پر (Provisional Vesting) اور پھر مستقل طور پر (Permanent Vesting) سرکاری تحویل میں جا سکتے ہیں۔ یہ ایک ایسی تلوار ہے جو ہر اس ادارے کے سر پر لٹک رہی ہے جس نے کبھی نیک نیتی سے بیرونی امداد وصول کی تھی۔

خاموشی کب تک؟ عیسائی اداروں کا تحرک اور ہمارا جمود
خبریں بتاتی ہیں کہ عیسائی برادری کے ادارے اس وقت سب سے زیادہ متحرک اور فکر مند ہیں۔ ان کے اسکول، کالج اور ہسپتال دہائیوں سے ملک کی خدمت کر رہے ہیں۔ ان کا خوف جذباتی نہیں، بلکہ زمینی حقائق پر مبنی ہے۔ انہوں نے وزیر داخلہ امت شاہ سے ملاقاتیں کیں، شمال مشرقی ریاستوں کے وزرائے اعلیٰ نے آواز بلند کی، حتیٰ کہ میزورم و میگھالہ سے این ڈی اے کی حلیف جماعتوں نے بھی اس بل کی مخالفت میں ووٹ دینے کا اعلان کر دیا۔

یہاں ایک اہم سوال ملتِ اسلامیہ کے اداروں کے لیے بھی ہے کہ جب دیگر اقلیتیں اپنے حقوق کے تحفظ کے لیے ایوانوں کے دروازے کھٹکھٹا سکتی ہیں، تو ہمارے بڑے مدارس، ملی تنظیمیں اور تعلیمی ٹرسٹ خاموش کیوں ہیں؟ قانون بن جانے کے بعد کی لمبی اور تھکادینے والی قانونی لڑائی سے بہتر ہے کہ قانون سازی کے عمل کے دوران ہی اپنی آواز موثر انداز میں پہنچائی جائے۔

پانچ مطالبات: انصاف کی آواز
ہمیں کسی رعایت کی ضرورت نہیں، ہمیں صرف عدل و انصاف کا تحفظ چاہیے۔ مسلم تنظیموں اور سماجی اداروں کو چاہیے کہ وہ حکومت کے سامنے یہ پانچ نکاتی ایجنڈا رکھیں:
1.تکنیکی لغزش اور سنگین جرم کا فرق: معمولی انتظامی غلطی کو قومی سلامتی کے خلاف جرم قرار نہ دیا جائے۔
2.سماعت کا حق: رجسٹریشن منسوخ کرنے سے قبل باقاعدہ نوٹس، سماعت اور وجوہات پر مبنی تحریری فیصلے کا حق دیا جائے۔
3.عدالتی نظرثانی (Judicial Review): کسی بھی جائیداد کی مستقل تحویل سے پہلے آزاد عدلیہ کی توثیق لازمی ہو۔
4.مالیاتی تقسیم: ملکی اور غیر ملکی فنڈز سے بننے والے اثاثوں کا الگ الگ حساب کتاب تسلیم کیا جائے۔
5.باعزت انخلا (Exit Route): جو ادارہ آئندہ بیرونی امداد نہیں لینا چاہتا، اسے مکمل حساب دہی کے بعد ایف سی آر اے سے باضابطہ نکلنے کا راستہ دیا جائے۔

حرفِ آخر: قانون کی حکمرانی یا سیاسی ہتھیار؟
یہ یاد رکھنا ضروری ہے کہ "حکمران بدلتے رہتے ہیں، مگر اختیارات باقی رہتے ہیں۔” آج اگر یہ قانون کسی ایک گروہ کو دبانے کے لیے استعمال ہو رہا ہے، تو کل اس کی زد میں کوئی بھی آ سکتا ہے۔ دستورِ ہند کا آرٹیکل 14 (مساوات)، آرٹیکل 19 (اظہارِ خیال و انجمن سازی) اور آرٹیکل 25 و 26 (مذہبی آزادی) ہمیں وہ ڈھال فراہم کرتے ہیں جس کے سائے میں ریاست کو جوابدہ بنایا جا سکتا ہے۔ بہترین قانون وہ نہیں جو آج کے حکمران کے ہاتھ مضبوط کرے، بلکہ وہ ہے جو آنے والے کل کے حکمران کو بھی آئین کا پابند رکھے۔ ایف سی آر اے میں ترمیم کا مقصد اگر واقعی قومی سلامتی ہے، تو اس میں شفافیت اور عدالتی نگرانی کا ہونا لازمی ہے۔ ریاستیں حکومتوں سے بڑی ہوتی ہیں، اور آئین کو ہمیشہ حکمرانوں سے بالا تر ہونا چاہیے۔
وقت آ گیا ہے کہ ہم مصلحت کی چادر اتاریں اور آئینی حدود کے اندر رہتے ہوئے اپنے اداروں کے مستقبل کی جنگ لڑیں، اس سے پہلے کہ بہت دیر ہو جائے۔