جشنِ ہدایہ: بحُسن و خوبی اختتام کو پہنچا

ای سی نیوز ڈیسک
26 جنوری 2026

جامعۃ الہدایہ کیمپس اور اس کی ذیلی شاخ الہدایہ پبلک اسکول بدلاپور کے اشتراک سے منعقد ہونے والا سالانہ پروگرام ”‌جشنِ ہدایہ“   نہایت وقار، حسنِ ترتیب اور علمی شان کے ساتھ  بحُسن و خوبی اختتام پذیر ہوا۔ اس بامقصد تقریب میں مرد و خواتین کی بڑی تعداد کی شرکت نے اس امر پر مہرِ تصدیق ثبت کر دی کہ الہدایہ کا تعلیمی و تربیتی سفر عوامی اعتماد اور مقبولیت کی نئی منزلیں طے کر رہا ہے۔
تقریب کا آغاز فضاؤں کو معطر کر دینے والی تلاوتِ قرآنِ کریم سے ہوا، جسے طلبہ نے مختلف زبانوں میں ترجمے کے ساتھ پیش کیا۔ اس روح پرور آغاز کے بعد طلبہ نے دل کو چھو لینے والے نشید، الہدایہ ترانہ، بامعنی مکالمے اور اردو، عربی، انگریزی اور مراٹھی زبانوں میں پُراثر تقاریر پیش کر کے سامعین کے دلوں میں اپنی علمی پختگی اور فکری بالیدگی کا نقش ثبت کر دیا۔

پروگرام کے یادگار اور قابلِ فخر لمحات اس وقت مزید روشن ہو گئے جب دو ہونہار طلبہ، عبدالسبحان انصاری اور شیخ علی بلال سلمہما، کو تکمیلِ حفظِ قرآنِ کریم کی عظیم سعادت حاصل کرنے پر دستارِ فضیلت، سرٹیفکیٹ اور ٹرافی سے نوازا گیا۔ اسی موقع پر ایک ممتاز طالب علم عبدالرحمن سلمہٗ کو ایک ہی نشست میں مکمل قرآنِ کریم سنانے کی غیر معمولی اور نادر سعادت حاصل کرنے پر خصوصی سند اور اعزازی سرٹیفکیٹ سے بھی سرفراز کیا گیا، جس پر حاضرینِ محفل نے بھرپور داد و تحسین پیش کی۔

اس علمی اجتماع کی شان اس وقت دوبالا ہو گئی جب ممتاز علماء اور دانشوروں نے اپنے بصیرت افروز خطابات سے سامعین کی فکری رہنمائی کی۔ جناب مولانا مفتی رفیق احمد پور کر مدنی، مفتی سید محمد حذیفہ صاحب قاسمی (بھیونڈی) اور مرکز المعارف ایجوکیشن اینڈ ریسرچ سینٹر، ممبئی کے ڈائریکٹر مولانا برہان الدین قاسمی نے اپنے خطابات میں دورِ حاضر کے دینی، تعلیمی اور سماجی چیلنجز کو نہایت سنجیدگی اور حکمت کے ساتھ واضح کیا، اور نئی نسل کو علم، کردار اور عملی بصیرت سے آراستہ کرنے پر زور دیا۔

تقریب کی نظامت دینیات ڈائریکٹر مفتی نثار احمد صاحب قاسمی اور ادارے کے مؤقر استاد نعمان سر نے نہایت خوش اسلوبی، سلیقے اور حسنِ ترتیب کے ساتھ انجام دی، جس سے پروگرام کی روانی اور دلکشی برقرار رہی۔
اختتامی مرحلے میں الہدایہ گروپ آف انسٹیٹیوشنز کے چیئرمین ڈاکٹر سید کمال انظر صاحب، فعال و متحرک کیمپس ہیڈ انجینئر سید عاقب سر اور سید حافظ عمار صاحب نے اساتذہ، منتظمین اور طلبہ کی محنت، نظم و ضبط اور اخلاص کو سراہتے ہوئے دلی شکریہ ادا کیا، اور آئندہ بھی تعلیمی و تربیتی سرگرمیوں کو مزید وسعت دینے کے عزم کا اظہار کیا۔ اس موقع پر تعلیمی، تدریسی اور ہم نصابی سرگرمیوں میں نمایاں کارکردگی دکھانے والے طلبہ اور اساتذہ کو حسبِ لیاقت تشجیعی انعامات سے نوازا گیا۔ یہ تقریب اس بات کا روشن ثبوت بنی کہ الہدایہ نہ صرف علم کا مرکز ہے بلکہ کردار سازی اور تہذیبی تربیت کا مضبوط قلعہ بھی ہے ۔