مولانا بدر الدین اجمل کو دنیا کے 500 با اثر مسلمانوں کی فہرست میں لگاتار سولہویں مرتبہ شامل کئے جانے پر مبارکباد
ای سی نیوز ڈیسک
13 اکتوبر 2024
ممبئی ـــ: جارڈن کی مشہور تحقیقی تنظیم روئیل اسلامک اسٹریٹیجک اسٹڈیز نے ہر سال کی طرح اِس سال بھی 2025 کے لئے اپنی مشہور میگزین The 500 Most Influential Mulims شائع کیا ہے جس میں دنیا بھر کے مسلمانوں میں سے پانچ سو سب سے بااثر مسلمانوں کا نام منتخب کر کے ان کی فہرست جاری کی ہے۔ آل انڈیا یونائیٹیڈ ڈیموکریٹک فرنٹ کے قومی صدر، جمعیۃ علماء صوبہ آسام کے صدر، دارالعلوم دیوبند کی مجلس شوری کے رکن، سابق رکن پارلیمنٹ اور معروف عالم دین مولانا بدرالدین اجمل القاسمی بھی اُن شخصیات میں شامل ہیں جن کو اِس میگزین کے ذریعہ تیارکردہ "دنیا کے پانچ سو سب سے با اثر مسلمان” کی فہرست میں 2009 سے لیکر اب تک ہر سال شامل کیا گیا ہے۔
واضح رہے کہ مذکورہ ادارہ نے مولانا بدرالدین اجمل کو ان کے ذریعہ بے مثال سماجی خدمات انجام دینے، دینی و عصری تعلیمی اداروں کے قیام کے ذریعہ تعلیمی انقلاب کی داغ بیل ڈالنے،بہتر علاج کے لئے رفاہی ہاسپیٹل قائم کرنے، یتیموں اور بیواؤں کی دستگیری کرنے، مصیبت زدہ لوگوں کے لئے رفاہی خدمات انجام دینے، ضرورت مندوں کے لئے گھر اور روزگار کا انتظام کرنے، سیاسی میدان میں نمایاں کردار ادا کرنے، نیز تجارت میں منفرد شناخت بنانے کی بنیاد پر”دنیا کے پانچ سو سب سے با اثر مسلمان” کی لسٹ میں شامل کیا ہے۔ لگاتار سولہویں مرتبہ اس فہرست میں شامل کئے جانے پر مختلف میدانوں سے تعلق رکھنے والے حضرات نے خوشی کا اظہار کرتے ہوئے کہا ہے کہ اگرچہ مولانا بدرالدین اجمل صاحب اپنے کارہائے نمایاں کی وجہ سے کسی تعارف کے محتاج نہیں ہیں مگر اُن کی خدمات کے پیشِ نظر اُن کا نام اِس فہرست میں مزید نمایاں طور پر آنا چاہئے کیوں کہ حقیقت یہ ہے کہ مولانا اجمل کی شخصیت اپنے آپ میں ایک انجمن اور تحریک ہے، جن کی خدمات کا جائزہ لینے کے لئے ہزاروں صفحات نا کافی ہیں۔
ان لوگوں نے کہاہے کہ مولانا اجمل کی خدمات کا میدان بہت وسیع ہے جس میں وہ کامیابی کے ساتھ پا بہ رکاب ہیں اور دن بدن اپنی خدمات کا دائرہ وسیع کرتے جا رہے ہیں، اِس لئے ہم لوگ انہیں دلی مبارکباد پیش کرتے ہیں اور ان کے لئے دعاء کرتے ہیں کہ اللہ ان کو صحت و عافیت کے ساتھ رکھے اور ان کا سایہ امت پر دراز کرے تاکہ وہ ملک و ملت کی مزید خدمات انجام دیتے رہیں۔
یاد رہے کہ اِس میگزین کا سب سے پہلا شمارہ 2009 میں شائع ہوا تھا،تب سے تقریبا ہر سال شائع ہوتا آرہا ہے جو دنیا بھر میں پذیرائی حاصل کرنے میں کامیاب رہا ہے۔اس سال شا ئع ہونے والی میگزین اِس ادارہ کا سولہواں شمارہ ہے۔ یہ ادارہ دنیا بھر کے مسلمانوں میں سے نمایاں شخصیات کے حالات زندگی، مختلف میدان عمل میں ان کی خدمات و کارکردگی اور ان کی کامیابی کو بنیاد بناکر اُن کی فہرست تیار کرتا ہے اورپھر ان کے کارناموں کے پیش نظر ان میں رینکنگ کرتا ہے۔
