آذربائیجان کے الہام علیوف اپنی ہی سیاسی قبر کھود رہے ہیں

از: محمد برہان الدین قاسمی
ایڈیٹر: ایسٹرن کریسنٹ، ممبئی

آذربائیجان بظاہر اسی صورتِ حال کی طرف بڑھ رہا ہے جس کی یاد تیونس میں زین العابدین بن علی اور شام میں بشار الاسد کے دورِ حکومت سے وابستہ ہے۔ ہر عروج کو زوال ہے اور ہر آمر حکمران کا بھی ایک دن خاتمہ ہوتا ہے۔

آذربائیجان میں حالیہ احتجاجات کو الہام علییف اور ان کے حکمراں خاندان کے اقدامات نے پیدا کی ہے، بالخصوص ان احکامات نے کہ طالبات اور خاتون اساتذہ کے سروں سے حجاب کو اتارنے پر مجبور کیا جا ئے۔ یہ سب ایک ایسے ملک میں ہو رہا ہے جس کی آبادی کی اکثریت مسلمان ہے، اگرچہ ریاستی طرزِ عمل میں اس مسلم اکثریت کی عکاسی نہیں ہوتی۔ سوویت یونین کا کمیونسٹ دور کب کا ختم ہو چکا ہے، لیکن اس کی میراث سے تشکیل پانے والے حکمران اب بھی آذربائیجان سمیت متعدد سابق سوویت ریاستوں میں اقتدار پر قابض ہیں۔

حجاب پر پابندیوں کے خلاف احتجاجات میں ایک وسیع تر بحران کی شکل اختیار کرنے کی صلاحیت موجود ہے۔ ایسے وقت میں جب روس اب پہلے کی طرح مکمل طور پر قابلِ اعتماد شراکت دار نہیں رہا اور پڑوسی ممالک ایران اور آرمینیا بھی علییف کے حلیف نہیں ہیں، ان کے لیے اپنے اقتدار کو محفوظ رکھنا بتدریج مشکل ہو سکتا ہے۔ اس سے بھی اہم بات یہ ہے کہ ترکی اور پاکستان، جو آذربائیجان کے دیرینہ اور قریب ترین دوست ہیں، ایسی پالیسی سے مطمئن نہیں رہ سکتے جسے تمام دیندار مسلمان غیر اسلامی، غیر جمہوری اور ظالمانہ سمجھتے ہیں۔ اگر ان کی حکومتیں علییف کی سیاسی مدد کرنا بھی چاہیں تو ان پابندیوں کے خلاف عوامی غصہ ان کے لیے ایسا کرنا مشکل بنا سکتا ہے۔

ترکی اب مصطفیٰ کمال اتاترک کے دور کا ملک نہیں رہا، جن کی حکومت نے عوامی زندگی میں حجاب پر ظالمانہ پابندیاں عائد کر رکھی تھیں۔ دوسری طرف پاکستان میں اسلامی سمجھے جانے والے معاملات پر عوامی ردِعمل اکثر بہت اونچی اور پُرجوش ہوتا ہے، اگرچہ ملک کی سیاسی اور فوجی قیادت ہمیشہ اپنے دعووں کے مطابق عمل نہیں کرتی۔ ان دونوں ممالک میں ایسی پالیسی، جسے مسلمانوں کے مذہبی اظہار پر حملہ سمجھا جائے، آذربائیجان کی قیادت کے خلاف شدید عوامی تنقید کو جنم دے سکتی ہے۔

دوسری جانب یورپ اور امریکہ بھی علییف کے دفاع کے لیے فوری طور پر آگے آتے دکھائی نہیں دیتے۔ کاراباخ کے معاملے پر آذربائیجان کی جنگوں اور آرمینیا کے ساتھ اس کے تنازعے نے اس کے بین الاقوامی تعلقات کی تشکیل میں اہم کردار ادا کیا ہے، جبکہ ترکی نے باکو کی فوجی فتح میں فیصلہ کن کردار ادا کیا تھا۔ مغربی حکومتوں کے اپنے تزویراتی مفادات اور حساب کتاب ہیں، خصوصاً روس اور یوکرین کے درمیان جاری جنگ کے تناظر میں وہ مزید کسی کی مدد کے پوزیشن میں نہیں ہے۔ ایسے میں ان کی حمایت محض بیان بازی اور ذرائع ابلاغ میں تبصروں تک محدود رہ سکتی ہے۔ بعض حلقے نام نہاد سیکولرازم کے نام پر آذربائیجان کا دفاع کر سکتے ہیں، لیکن جب مسلم اکثریتی ممالک کے معاملے میں جمہوری اصولوں کا اطلاق غیر یکساں انداز میں کیا جائے تو ایسے مؤقف میں دوہرے معیار کا عملی نمونہ صاف صاف نظر آتا ہے۔

اس حجاب پر پابندی کے معاملے میں آذربائیجان کے سب سے نمایاں شراکت داروں میں سے ایک اسرائیل ہے، لیکن وہ جغرافیائی طور پر آذربائیجان سے الگ ہے اور علییف کی حکومت کے اقتدار کو برقرار رکھنے کی ضمانت دینے کی پوزیشن میں بالکل بھی نہیں ہے۔ ایران کے ساتھ اس کی اپنی محاذ آرائی اور امریکہ و اسرائیل کے درمیان وسیع تر علاقائی تنازعے نے بھی بامعنی مدد فراہم کرنے کی اس کی صلاحیت کو مزید محدود کر دیا ہے۔ مزید یہ کہ مذہبی اور اظہارِ اسلام سے متعلق معاملے میں اسرائیل جتنی کھل کر آذربائیجان کی حمایت کرے گا، دنیا بھر کے مسلمانوں میں باکو کی سیاسی تنہائی بڑھنے کا خطرہ اتنا ہی زیادہ ہوگا۔

موجودہ صورتِ حال میں آذربائیجان کو اس معاملے پر اپنے پڑوسیوں یا وسیع تر مسلم دنیا، بشمول اسلامی تعاون تنظیم (او آئی سی) اور خلیجی عرب ریاستوں میں، قابلِ اعتماد حامی کم ہی نظر آتے ہیں۔ کاراباخ کی جنگ کے دوران آذربائیجان کے ساتھ ہمدردی رکھنے والے بہت سے مسلمان اب اس پالیسی سے ناراض ہیں جسے وہ سیکولرازم کی آڑ میں اختیار کیا جانے والا اسلام مخالف اور اسلام دشمن طرزِ عمل سمجھتے ہیں۔

اس معاملے میں وسیع تر علاقائی صورتِ حال بھی اہمیت رکھتی ہے۔ آذربائیجان کے زیادہ تر باشندے شیعہ مسلمان ہیں اور ان کے ایران کے ساتھ مذہبی روابط ہیں، جبکہ زبان اور ثقافت کے رشتے ان میں سے بہت سوں کو سنی اکثریتی ترکی کے قریب کرتے ہیں۔ موجودہ جغرافیائی و سیاسی حالات کے پیشِ نظر اگر تہران اور انقرہ کی حکومتیں باکو کو کھلے عام چیلنج کرنے سے گریز بھی کریں، تب بھی سرحد پار عوامی رائے آذربائیجانی شہریوں پر اثر انداز ہو سکتی ہے۔ خاندانی تعلقات، مذہبی قربت اور ثقافتی تبادلے اس اثر کو مزید تقویت دے سکتے ہیں۔

اب تک احتجاجات محدود اور زیادہ تر اسکولوں تک مرتکز دکھائی دیتے ہیں، اور ان کے پیچھے بیرونی مداخلت یا کسی بیرونی قوت کی رہنمائی کا کوئی ثبوت سامنے نہیں آیا ہے۔ تاہم، یہ صورتِ حال بتدریج بدل سکتی ہے۔ اگر پابندیاں برقرار رہیں تو مظاہرے پھیل سکتے ہیں اور بالآخر دوسرے عناصر بھی اس بے چینی سے فائدہ اٹھانے کی کوشش کر سکتے ہیں۔ علییف کے لیے دانش مندی کا تقاضا یہی ہے کہ وہ احتجاجات کو معمولی نہ سمجھیں اور یہ فرض نہ کر لیں کہ محض طاقت کے استعمال سے انہیں قابو میں رکھا جا سکتا ہے۔

ان کے لیے محفوظ ترین راستہ یہی ہے کہ وہ ان پابندیوں کو واپس لیں اور اپنے شہریوں کی مذہبی آزادی اور عزتِ نفس کا احترام کریں۔ جو حکومت لوگوں کے ذاتی اور مذہبی عقیدے کے معاملے کو اپنی ہی عوام کے ساتھ تصادم میں بدل دیتی ہے، وہ ایسے بحران کو جنم دینے کا خطرہ مول لیتی ہے جس پر قابو پانا اس کے لیے ممکن نہ رہے۔ کسی بھی حکمران کے لیے پوری قوم کی امنگوں کو غیر معینہ مدت تک دبائے رکھنا ممکن نہیں ہوتا۔ اگر علییف اسی راستے پر چلتے رہے تو بعید نہیں کہ وہ واقعی اپنی ہی سیاسی قبر کھود رہے ہوں۔