آل انڈیا مسلم پرسنل بورڈ کا وفد سکھ مذہبی رہنماؤں سے ملا، یکساں سول  کوڈ پر گفتگو

ممبئی 6 جولائی(پریس ریلیز) یونیفارم سیول کوڈ کے مسئلہ پر گفت و شنید کے لیے مسلم پرسنل لا بورڈ کے ایک وفد نے دادر گردوارہ شری گرو سنگھ سبھا کے دفتر میں جاکر سبھا کے صدر منموہن سنگھ رتی اور بلبیر سنگھ باتھ سکریٹری سے ملاقات کی اور یکساں سیول کوڈ کے نقصانات سے آگاہ کیا نیز متحد ہوکر اس کا مقابلہ کرنے پر زور دیا۔ یہ بات ان کے گوش گذار کی گئی کہ یونیفارم سیول کوڈ مذہب کے مطابق زندگی گذارنے کے بنیادی حق کو پامال کرتا ہے۔ یہ دستور ہند کے بھی منافی ہے۔ حکومت وقت سیاسی فائدے کے لیے اسے استعمال کرکے عوام کو آپس میں لڑانا چاہتی ہے۔ یہ اقلیتوں اور قبائلیوں کے تہذیبی تشخص پر حملہ ہے۔ اس کا مقابلہ کرنے کے لیے سبھی طبقات کا متحد ہونا وقت کی اہم ترین ضرورت ہے۔ اس پیشکش کا مثبت جواب ملا۔ بورڈ کے وفد میں مندرجہ ذیل افراد شریک تھے۔ محمود خان دریابادی، مولانا ظہیر عباس رضوی، مولانا عبدالجلیل سلفی،جناب فرید شیخ،مولانا انیس اشرفی، حافظ اقبال چوناوالا،عبد الحفیظ فاروقی، عرفان خان، شاکر شیخ، عبیداللہ شیخ، فضیل بھوئیرا،سلیم خان.